Боков Ахьмад ваьв 1924 шера Соаг1апча ахархочун дезале.

             Ахьмад Наьсарерча зооветеринарни техникуме а Шолжа-Г1алий т1арча рабфаке а дешаш хиннав. 1941 шера хьехархой курсаш яьхачул т1ехьаг1а юрта школе балха вахийтав Боков Ахьмад, бакъда, из болх бе в1ашт1ехьадаланзар – т1ом гаргаг1ертаб Маг1албика.

        1945 шера Казахски горно-металлургически институте деша вода Ахьмад, бакъда, исскусство дукха езаро из воалаву Алма-Атински киноактерски школе.

        1957 шера денз «Сердало» газета корреспондент, Наьсарерча халкъа театре режиссер, грозненски телестуде балхаш деш хьавера Боков Ахьмад.

        Массехк шера цул т1ехьаг1а цо болх бу «Лоаман 1уйре» яхача альманаха керттера редактор волаш, массехказа РСФСР – а йоазонхой съезда делегат хул Ахьмад, болхлошта, ахархошта хьалхашка дукхаза къамаьлаш деш, язде болалучарна г1о-новкъостал деш хьавоаг1а из. Дукха чоалхане дац цун вахар, амма из деррига вахар цхьан х1аман т1акхувш да: говзаме йоазошца дикадар хоастаде, водар лочкъаде. Боков Ахьмада дикка къахьийгад дувцараш, пьесаш, повесташ язъеш.

        Ахьмада кхолламе йоккха моттиг д1алоац дувцараш. Ше эггара хьалха язде волалушехьа цар т1ара волавелар из. Вай мехка вахара керттера а лоарх1амег1а а йола ханаш ювца г1ерт А.Боков ший романашца. Ахьмадас дукха романаш яздаьд. Уж да:

       «Беке къонгаш», «Ц1ийенна сайре», «Седкъашта юкъе седкъа санна», «1аи б1аьстии в1ашаг1къасташ», «Кхел».

        Ала деза, йоазонхочун кхолламо чулоац вай мехка еррига истори: вай мехкахой Туркий мехка бахийтар граждански т1ом, Сийлахь-боккха даьхен т1ом, таханар вахар.

        Боков Ахьмада дика йоазош дира сий а деш, Нохч-Г1алг1ай Лакхерча Совета Президиума указах 1978 шера халкъа йоазонхо аьнна ц1и тиллар цох.